Die Kaap moet Federale Staat word vir Bruines, Khoisan en Blankes

’n Wes-Kaapse groep en ’n sakeman van Mosselbaai wil ’n referendum hê sodat inwoners kan besluit of hulle in die toekoms in ’n federale staat wil woon waar besluite sonder die regering se inmenging geneem kan word.

Volgens Peter Marais, voorsitter van die Bruin Bemagtigingsbeweging, en Hein Marx, ’n sakeman, is ’n onafhanklike Kaapland, wat die Wes- en Noord-Kaap insluit, ’n haalbare missie van ver­skeie groeperinge in die bruin en wit gemeenskappe in dié provinsies.

Marais het, kort nadat hy en Marx Vrydag aan ’n geselsprogram op Radio Tygerberg deelgeneem het, aan die Die Burger gesê die idee van ’n federale staat met sy eie selfbeskikking is nie iets wat bloot uit hul duime gesuig is nie. Selfbeskikking is in afdeling 235 van die Grondwet vervat en word ook in internasionale wetgewing erken, het hy gesê.

Volgens Marais het die Wes-Kaap reeds die strukture om as federale staat voort te bestaan.

“Daar sal aanvanklik dalk ’n kleinerige ekonomiese insinking wees indien die provinsies van die res van die land wegbreek, maar dit sal van korte duur wees,” het Marx bygevoeg.

Marais het gesê ’n federale stelsel is die enigste manier om inwoners se taal, kultuur en godsdiens te beskerm. “Ons is nie van plan om teen enige van die bestaande groepe inwoners te diskrimineer nie. Dié groepe sal egter daarmee vir lief moet neem dat hulle die minderheid in die federale bedeling sal wees.”

Volgens Marais sal so ’n plan net namens die provinsie se inwoners beding word indien die meerderheid inwoners hul toestemming deur deelname aan ’n referendum gee. Op ’n vraag oor hoe die referendum gehou sal word, het hy gesê die provinsiale regering sal eerste om toestemming genader word. “Ek wil beklemtoon dié is net ’n voorstel. Enigiemand met ’n beter plan is welkom om dit op die tafel te plaas.”

Nuus24

Enjoyed this post? Share it!

 

One thought on “Die Kaap moet Federale Staat word vir Bruines, Khoisan en Blankes

Leave a comment